Саудия Арабистонидан АҚШга нефть экспорти охирги 6 йил ичидаги минимал кўрсакткичларга тушиб кетди. The Financial Times нашрининг ёзишича, бунга маълум даражада Канададан нефть экспортининг кучайиши ва “сланец инқилоби” сабаб бўлган.

Маълум қилинишича, Саудия Арабистони осиёлик мижозларга, биринчи навбатда, Хитойга кўпроқ эътибор қаратмоқчи.
Охирги 12 ой давомида АҚШ Саудиядан кунига ўртача 1 млн баррель нефть сотиб олган бўлиб, бу 2009 йилдан буён қайд қилинган энг паст кўрсаткичдир. 2013 йилда эса АҚШ Саудиядан кунига 1.5 млн баррель нефть харид қилган.
Колумбия университети қошидаги Халқаро энергетика сиёсати маркази директори ва муассиси Жейсон Бордоффнинг фикрича, Саудиянинг бу ҳаракатлари бундан буён асосий экспорт бозори Сувайш каналидан шарқда жойлашишини кўрсатади.

Айни пайтда Канада АҚШга кунига 3 млн баррель нефть етказиб бермоқда. 2011 йилдан буён Канада экспорти 1 млн баррелга ўсди.