Яманлик хакерлар Саудия Арабистони ҳукумати сайтларига муваффақиятли ҳужум қилишганини эълон қилди. Бунинг оқибатида улар қиролликнинг Ташқи ишлар, Ички ишлар ва мудофаа вазирликлари архивларида сақланган “минглаб ўта махфий ҳужжатлар”ни қўлга киритишга муваффақ бўлишган.

Гап махфий агентлар тўғрисидаги шахсий маълумотлар ва алоқа усуллари, Ар-Риёднинг юқори лавозимли амалдорларининг 1980-йиллар бошидан юритган махфий ёзишмалари ҳақида кетмоқда.

“Биз Саудия Арабистони Ташқи ишлар вазирлигининг ёпиқ тармоғига, 3 мингта компьютер ва серверларга кира олдик, минглаб фойдаланувчилар ҳақидаги маълумотларни қўлга киритдик. Биз электрон ёзишмалар, минглаб амалдорлар, турли хорижий миссиялар дипломатлари ҳақидаги махфий файлларга кира олдик”, дейилмоқда хакерлар берган хабарда.

Ушбу ҳужумни амалга оширган “Яман кибер-армияси” агар Ар-Риёд “Яманда мусулмонларга қарши ҳужум қилишни бас қилмаса” бу маълумотларни босқичма-босқич интернетга қўйиб бориши билан таҳдид қилмоқда.

Гуруҳнинг айтишича, қироллик сайтларига уюштирилган бу ҳужум гуруҳ томонидан амалга оширилган 2-чи муваффақиятли операция бўлди ҳамда “Ансор Аллоҳ” ҳаракатининг асосчиси “Саид Бадруддин ал-Хусий” деб ном олди.

Аввалроқ гуруҳ Саудия Арабистонининг Ямандаги ҳаракатларига норозилик сифатида 14 апрелда Саудия Арабистонининг Al-Hayat газетаси сайтига ҳужум уюштирган эди.