АҚШлик миллиардер Жорж Сороснинг фикрича, янги жаҳон уруши содир бўлиши эҳтимоли бор. Унинг айтишича, урушнинг бошланишига Хитой ва АҚШ ўртасидаги можаро сабаб бўлиши мумкин.

Сороснинг фикрича, шундай вазият агар Хитой ўзининг иқтисодиётини экспортга эмас, балки ички эҳтиёжларига қаратса юз бериши мумкин. Унда Хитой ҳукуматига ўз ҳокимиятини ушлаб қолиш учун ташқи тўқнашув керак бўлади.

“Хитой ва АҚШнинг ҳарбий иттифоқчиси Япония билан тўқнашув содир бўлса, биз учинчи жаҳон уруши остонасида бўлиб қоламиз, деб бўрттирмасдан айтишимиз мумкин”, дейди Сорос.

Миллиардернинг фикрича, бунга йўл қўймаслик учун АҚШ Хитойга “ён босишига”, яъни юанни Халқаро валюта жамғармасининг валюта саватчасига киритилишига рози бўлиши керак бўлади. Хитой валютаси бу ҳолда долларга жиддий рақобат ташкил этиши мумкин. Хитой бунга жавобан ўз иқтисодиётини қайта ўзгартириш борасида ён босиши талаб этилади.

Сороснинг айтишича, Хитой ва АҚШ муросага келиши қийин, бироқ улар буни амалга ошира олишмаса, “оқибати ёмон бўлади”. Акс ҳолда Хитой Россия билан сиёсий ва ҳарбий иттифоқ тузишининг жиддий хавфи мавжуд бўлиб, унда янги жаҳон уруши хавфи ҳақиқатда юзага келади, деб айтмоқда Сорос.