Россиялик актриса Чўлпон Хаматова 2012 йилда Россия президенти Владимир Путиннинг сайловолди ролигида янги шифохона қурилиши эвазига суратга тушган. Бу ҳақда Хаматова Postimees нашрига берган интервьюсида айтиб ўтди.

Журналистнинг Чўлпонга айни кунда ҳам сайловолди ролигида тушиш таклифи тушганда, у бу таклифни қабул қилармиди, деган саволга жавобан актриса “Агар яна битта шифохона қуриладиган бўлса, қабул қилардим. Мен яна худди шундай қилган бўлардим”, деб айтди.

Хаматованинг фикрича, оқ ва қорага ажратиш мавжуд эмас, бироқ яхши ва ёмон қилмишларга ажратиш мавжуд. “Менинг давлатим кўп яхши ишлар қилади. Шу давлатимнинг ўзи қўрқинчли, даҳшатли, қайғули, қабиҳ ишларни ҳам қилади. Ва мен унинг яхши ишлари учун унга доим миннатдорчилик билдиришга тайёрман”, деб айтди акстриса.

2012 йилда Хаматова “Ника” мукофотини олаётиб унинг Путинни қўллаб-қувватловчи роликдаги иштироки ҳақидаги Ксения Собчакнинг саволига жавоб бермаган эди.