Яқин кунларгача йўловчи ва ҳайдовчилар Самарқанддан Навоийгача олиб борувчи йўллардан шикоят қилиб турарди. Айниқса бу ўнқир-чўнқир йўллардан юришга мажбур бўлган Бухоро ва Урганч ҳайдовчилари ва йўловчилари кўпроқ азият чекишарди. Бугунда бу йўллар таъмирланди.

Жорий йилнинг 25 апрелидан 20 майигача халқаро ва давлат аҳамиятидаги автомобиль йўлларининг ҳолатига жавоб берувчи “Ўзавтойўл” корхонаси қошидаги Самарқанд ихтисослаштирилган таъмирлаш-фойдаланиш заводи томонидан М-39 рақамли халқаро аҳамиятдаги “Олма-ота-Бишкек-Тошкент-Термиз” йўлинининг 1037-1113 км ларида, “Самарқанд-Бухоро-Туркманбоши” автомобиль йўлининг 0-147 км ларида ва “Самарқанд ҳалқа йўли”нинг 33-46 км ларида жорий таъмирлаш ишлари ўтказилди. Бу йўллар Самарқанд вилоятининг Булунғур, Жомбой, Ургут, Самарқанд, Оқдарё, Иштихон, Каттақўрғон, Нарпай ва Пахтачи туманлари ҳамда Самарқанд ва Каттақўрғон шаҳарлари ҳудудидан ўтади.

Бу лойиҳани амалга ошириш учун 1,8 млрд сўм сарфланди.

Ҳозирда “Самарқанд-ш.-Жума- Каттақўрғон ш.” автомобиль йўлининг 0-49 км лик ҳудудида, яъни Самарқанддан Жума орқали Каттақўрғонга борувчи йўлда
таъмирлаш ишлари олиб борилмоқда. Йўлдаги чўнқирлар бартараф этилди. Эски йўл белгиларини янгиларига алмаштириш, йўл элементларини бўяш ва оқлаш ишлари ўз якунига етказилмоқда.

Самарқанд ва Шаҳрисабзни Тахти Қорача давони орқали боғловчи йўлнинг 20 км лик ҳудудида ҳам таъмирлаш ишлари олиб борилмоқда. Айни кунгача 3 минг тоннадан ортиқроқ асфальт-бетон қопламаси ётқазилди. Давон кўчки ва ўпирилишлар оқибатида йўлларда пайдо бўлган 5 минг куб метр тоғ жинсларидан тозаланди.

Ҳозирда йўл қурувчилари томонидан бутун республика бўйлаб йўллар сифатини яхшилаш бўйича таъмирлаш-қурилиш ишлари олиб борилмоқда.