“ИШИД” ўз тарғибот воситалари орқали яқин 12 ой ичида Покистонда ядровий қуролга эга бўлиши мумкинлиги ҳақида маълум қилди. Бу ҳақда 23 май куни Independent нашри хабар тарқатди.

Мазкур мақсадни амалга ошириш ҳақида террорчилар томонидан бир неча тилларда чоп этилаётган Dabiq журнали саҳифаларида сўз юритилган.

“ИШИД”нинг банклардаги ҳисоб рақамларида миллиардлаб доллар бор. Улар шунчаки Покистондаги ўз “вилояти”га қўнғироқ қилади ва коррупциялашган амалдорлар тизими орқали ядровий қуролни қўлга киритади”,  деб ёзади жангарилар қўлида асирликда бўлиб қайтган британиялик журналист Жон Кэнтли ўзининг “Идеал қуршов” (The Perfect Storm) мақоласида.

Шу ўринда таъкидлаш жоизки, террорчилар ўз фаолияти тарғиботи йўлида журналист Жон Кэнтлидан фойдаланмоқда. Аввалроқ интернетда Кэнтлининг 2012 йилда Сурияда асирга тушиб қолгани ҳақида видео маълумот чиқарилган эди.