Жорий йилда Ўзбекистонда ёзги соғломлаштириш мавсуми 1 июндан бошланади. 213 та стационар, 795 та кундузги ва 141 та меҳнат ва соғломлаштириш, умумий ҳисобда 1149 та болалар оромгоҳлари фаолият юритади. Ўзбекистон Касаба уюшмалари федерацияси кенгаши маълумотларига кўра, 39 млрд сўм ҳисобига мавсум давомида деярли 290 мингга яқин ўғил-қизларни соғломлаштириш назарда тутилган.

Мактаб ўқувчиларининг ёзги таътилни тўлақонли ўтказишларини таъминлашда оромгоҳларни тайёрлаш ва уларда замонавий шароитларни яратиш масалаларига алоҳида эътибор қаратилган.

Ижтимоий кам таъминланган ва эҳтиёжманд оилаларнинг болалари ва Оролбўйи ҳудудларидан 5 мингга яқин бола Тошкент шаҳри, Жиззах, Самарқанд, Қашқадарё ва Тошкент вилоятларидаги тоғли ҳудудларда жойлашган оромгоҳларда ҳордиқ чиқаради.

Оромгоҳларда ёзги таътилни сермазмун ташкил этиш мақсадида ҳамкор-ташкилотлар билан биргаликда турли маданий-маърифий тадбирлар, спорт мусобақалари ўтказилади, турли тўгараклар фаолият юритади. Болалар ихтиёрида маънавият ва маърифат хоналари, компьютер хоналари, кутубхоналар, футбол, волейбол, баскетбол майдончалари, сузиш ҳавзалари бўлади.

Жорий йилдан болаларнинг қизиқишларини ҳисобга олиб, ҳарбий-спорт, ижтимоий-мослашув, экологик-биологик, техника ва бадиий ижодиёт, меҳнат ва дам олиш оромгоҳлари фаолият юритишни бошлайди.

Болалар оромгоҳларида жамоат тартиби ва хавфсизликни таъминлаш мақсадида Ички ишлар вазирлиги томонидан мос тартибда ҳар бир оромгоҳга махсус ходимлар бириктириб қўйилади. Оромгоҳларда таълим-тарбия жараёнини ташкил этиш, уларни малакали ходимлар билан таъминлаш учун Халқ таълими вазирлиги томонидан кўплаб ўқув-методик қўлланмалар чоп этилган.