Сирдарё вилоятидаги 423та фуқаролар йиғинларининг жамоатчилик назорати ва истеъмолчиларнинг ҳуқуқларини ҳимоя қилиш бўйича комиссиялари таклифи билан “Маҳалла” хайрия жамоат фондининг вилоят бўлими, қишлоқ ва сув хўжалиги бошқармаси, истеъмолчилар ҳуқуқларини ҳимоя қилиш жамиятлари федерацияси, меҳнат ва аҳолини ижтимоий муҳофаза қилиш бошқармаси ҳамда бошқа манфаатдор ташкилотлар ҳамкорлигида 8та қишлоқ туманларида 81та агрофирма ташкил этилди. Бу ҳақда “Туркистон-Пресс” ахаборот агентлиги хабар тарқатди.

«Мазкур агрофирмалар ёрдамида аҳоли хонадонларидаги 13 минг 900 гектар ер майдонига 4200 тонна сабзавот ва полиз экини, 107 минг 900 туп кўчат экилди».

«Бунинг учун тижорат банклари томонидан 44,1 миллиард сўм микдорида кредит маблағи йўналтирилди. Истеъмолчиларнинг сифатли, арзон уруғ ва кўчат харид қилишлари учун кўчма дўконлар хизмати йўлга қўйилди», — дейди Сирдарё вилояти қишлоқ ва сув хўжалиги бошқармаси бошлиғи Абдуазим Хидиров.

Эътиборлиси, бугунги кунда вилоятда ишлаб чиқарилган ялпи ички маҳсулотнинг асосий қисми кичик бизнес ва хусусий тадбиркорлик субъектларига тўғри келишида томорқа хўжаликларининг алоҳида улуши борлиги қувонарли. Бу эса бозорларда озиқ-овқат маҳсулотлари кўпайиб, нарх-навонинг барқарорлашаётганидан, аҳоли бандлиги таъминланаётганидан далолатдир, дея ёзилади агентлик хабарида.