Бутунжаҳон бокс кенгаши (WBC) талқини бўйича жаҳон чемпиони Деонтей Уайлдер россиялик боксчи Александр Поветкин билан жанг қилишга тайёрлигини маълум қилди.

“Унвонимни ҳимоя қилиш учун Александр билан жанг қилишни интиқлик билан кутиб қоламан”, деб айтди америкалик боксчи.

“Р-Спорт” агентлигининг маълум қилишича, Уайлдер ва Поветкин ўртасида жангни уюштиришга “Мир бокса” рус промоутерлик компанияси ва унинг раҳбари Андрей Рябинский қизиқиш билдирмоқда. Рябинскийнинг фикрича, бу жангни АҚШда ўтказиш мумкин.

Эслатиб ўтамиз, 22 майда Поветкин Москвада кубалик Майк Перес устидан ғалаба қозониб, Уайлдер билан жанг ўтказиш ҳуқуқини қўлга киритди. Россиялик боксчи 1-раунднинг ўзидаёқ рақибини нокаутга учратишга муваффақ бўлди.

Уайлдер жорий йилнинг январь ойидан WBC чемпионлик камари эгаси ҳисобланади. Ўшанда у 12-раундлик жангда канадалик Бермейн Стиверн устидан очколар бўйича ғалаба қозониб, жаҳон чемпионига айланганди. Уайлдернинг ҳисобида 33 та жангдан 33 та ғалаба бор. Диққатга сазовор жойи шундаки, АҚШлик боксчи россиялик боксчидан анча баландроқ бўйга эга (2,01 метрга қарши 1,88 метр).