Ливияда Африка давлатларидан Европага ўтмоқчи бўлган 600 нафарга яқин ноқонуний муҳожир қўлга олинди. Қочқинлар Ливия пойтахти Триполи яқинида ўтказилган йирик тадбир давомида ушланган. Тадбир давомида телекоммуникацион қурилма ҳам мусодара қилинган.

Таъкидланишича, қўлга олинган қочқинлар Триполидаги вақтинчалик яшаш маркази ташқарисида жойлаштирилди, уларга сув ва егулик берилган. Ливиянинг 1770 кмлик соҳилбўйи ҳудуди анчадан бери муҳожирларнинг Европага ўтишларида кечув жойи вазифасини ўтаб келмоқда.

Муҳожирлардан кўпчилиги Ливия соҳилбўйидан 300 км узоқликда жойлашган Италиянинг Лампедуза оролига йўл олишади.

Ливия ҳукумати охирги вақтда ноқонуний муҳожирларга қарши курашни анча фаоллаштирди. Ўтган якшанбада ҳам одамларни кўчириб ўтказадиган контрабандачиларга қарши ўтказилган операцияда 400 муҳожир қўлга тушган эди.