Марокашнинг Работ шаҳрида дзюдо бўйича “Мастерс” сериясига кирувчи нуфузли турнир давом этмоқда. -60 кг вазн тоифасида юртимиз спорт шарафини ҳимоя қилган Шарофиддин Лутфуллаев бронза медалига сазовор бўлди.

Эътиборга молик жиҳати шундаки, Лутфуллаев бронза медали учун кечган беллашувда яна бир ҳамюртимиз Диёрбек Ўрозбоевни мағлубиятга учратди. Диёрбек 5-ўринни эгаллади. Шарофиддин аввалига арманистонлик Давтян Ховванесни, кейин грузиялик Амиран Папинашвили таслим этди. Ярим финалда эса бўлажак чемпион япониялик Наохиса Такатога имкониятни бой берди.

Ўрозбоев илк баҳсида мўғулистонлик анча таниқли дзюдочи Херлен Ганболдни енгди. Кейин эса яна бир мўғул полвони Болдбаатар Ганбатга имкониятни бой бериб қўйди. Ўтиш турнирида германиялик Тобиас Энглмайерни ютди, аммо жамоадоши Лутфуллаевга ютқазиб қўйди.

- 66 кг вазн тоифасида иштирок этган икки карра Олимпия ўйинларининг бронза медал совриндори Ришод Собиров эса кутилмаганда илк беллашувидаёқ россиялик Михаил Пуляевга имкониятни бой берди. -73 кг вазнда ҳамюртларимиздан ҳеч ким иштирок этмади.

Бундан ташқари, -81, -90 ва +100 кг вазн тоифаларида ҳам биздан ҳеч ким Марокашга бормаган. Аёллар терма жамоамиз ҳам бу мусобақада иштирок этмади. Бугун -100 кг вазн тоифасида Рамзиддин Саидов гиламга чиқади. У илк даврада голландиялик Хенк Грол билан ҳисоб-китоб қилади.