Ўзбекистон Марказий банки Россиянинг бир қатор оммавий ахборот воситалари, шу жумладан, “Россия-24” телеканали орқали мамлакатда валюта операцияларининг тўхтатилиши ҳақидаги ахборотнинг тарқатилиши юзасидан баёнот эълон қилди. У миллий регуляторнинг расмий сайтида жойлаштирилди.
“Россия Федерацияси оммавий ахборот воситалари, шу жумладан, “Россия-24” телеканали орқали тарқатилган Ўзбекистон Республикаси Марказий банки томонидан жисмоний ва юридик шахслар учун валюта операцияларининг тўхтатилиши ҳақидаги ахборот юзасидан баён қиламизки, бу хабарлар уйдирма ва провокациядир, валюта операцияларига ҳеч қандай чекловлар жорий қилинмаган”, – дейилади ҳужжат матнида.
Таъкидланишича, Ўзбекистон қонунчилигига мувофиқ, валюта операцияларининг ўтказилиш ҳамда у билан боғлиқ равишда чет эл валютасининг сотилиши ёки сотиб олиниши ҳеч қандай чекловларсиз амалга оширилади.
Шунингдек, айни кунларда долларнинг расмий курси “Россия телеканали кўрсатгандай” 5 000 сўм эмас, балки 2 527 сўмни ташкил қилиши қайд қилинди.
Бундай ахборотнинг тарқатилишини Марказий банк “провокация ва уйдирма” деб баҳолаб, баёнотнинг Россия оммавий ахборот воситаларида расмий раддия сифатида чоп этилишини талаб қилди.