Туркманистоннинг Ашхобод шаҳрида “аҳоли илтимосига кўра” президент Гурбангули Бердимуҳамедов от устида тасвирланган олтин суви юритилган ҳайкали ўрнатилди. Ҳайкалнинг тантанали очилиш маросими ОАВда кенг ёритилди.

РИА Новости агентлигининг келтирилишича, ҳайкалда Ахалтекин отига минган, туркман миллий либосларига бурканган Бердимуҳамедов тасвирланган. Унинг ёнидан учиб ўтаётган кабутар ҳам композициядан ўрин олган.

Ҳайкал бронзадан ясалиб, 24 карат зарварақ билан қопланган. 21 м баландликка эга ҳайкал 15 м ли тагкурсига ўрнатилган.
Туркманистон Мажлиси раиси Ақжа Нурбердиеванинг таъкидлашича, ҳайкал ўрнатиш ҳақидаги қарор парламент томонидан қабул қилинган. Бунга асос сифатида кўп сонли халқ мурожаатлари кўрсатилмоқда.

Сапармурод Ниёзов даврида Туркманистонда унинг кўплаб ҳайкаллари ўрнатилган эди. Улардан каттаси Ниёзовнинг Бетарафлик аркаси устига ўрнатилган 12 м ли олтин суви юритилган ҳайкали эди.
2010 йилда Бердимуҳамедов ушбу Бетарафлик аркасини демонтаж қилдириб, Ашхобод четида 95 м ли Бетарафлик монументини ўрнатди.