24 май куни Тошкентдаги Камолиддин Беҳзод номидаги Ёдгорлик боғ-музейида ўзбекистонлик машҳур рассом Александр Винернинг (1922-1992) асарларидан иборат кўргазма очилди. Очилиш маросимида унинг қизи, россиялик бадиий гимнастика мураббийи, жамоат арбоби Ирина Винер-Усмонова иштирок этди.

Тадбир Ўзбекистон санъат академияси томонидан Халқаро бадиий жамғарма кўмагида ташкил этилди. Экспозиция Винернинг Ўзбекистон давлат санъат музейи, Санъат академияси бадиий кўргазмалар дирекцияси, Ангрен расмлар галереясида сақланувчи асарларидан иборат.

Тантанали очилиш маросимида чиқиш қилган Винер-Усмонова хоним иштирокчиларга ўз миннатдорчилигини билдирди.

“Отамни ёдда сақлаётганингиз учун, келганингиз учун ташаккур. Отам ўзбек халқини жуда яхши кўрарди. У ҳар доим сафарларда юрарди, гоҳ Андижонда, гоҳ Сурхондарёда, гоҳ Бекобод, Ангренда… У рассом эди, оддий одамларни чизишни яхши кўрарди. У бирорта партия ёки ҳукумат вакилининг расмини чизмаган. Санъат ва маданият арбобларининг расмларини яратар эди. Менинг отам шунақа эди”, – деди у ўз чиқишида.