22-24 май кунлари Тошкент шаҳрида бадиий гимнастика бўйича жаҳон кубоги босқичи ва “Happy Caravan – 2015” халқаро турнири бўлиб ўтди. Мусобақаларда Жанубий Корея, Япония, Россия, Латвия, Беларусь, Болгария, Малайзия, Озарбойжон, Арманистон, ЖАР, Испания, Италия, Аргентина, Швейцария, Финляндия, Исроил каби давлатлардан юзга яқин гимнастикачи иштирок этди.

Мусобақаларнинг тантанали очилиш маросими Бадиий гимнастика бўйича болалар-ўсмирлар ихтисослаштирилган республика олимпия захираси спорт мактабида ўтказилди. Унда Ўзбекистон гимнастика федерацияси президенти Л.Каримова-Тиллаева ҳам қатнашди.

Бадиий гимнастика бўйича жаҳон кубоги босқичида Ўзбекистон шарафини ҳимоя қилган Анастасия Сердюкова булавада машқ бажариб, бронза медаль билан тақдирланди.

“Happy Caravan” халқаро турнирининг финал мусобақасида эса Сабина Тошкенбоева кўпкураш ва алоҳида гимнастика предметлари – арғамчи, тўп ва булава ёрдамида машқ бажариш бўйича жами тўртта бронза медаль билан тақдирланди. Ҳалқа ёрдамида машқ бажарган Нуринисо Усмонова ҳам учинчи ўринни эгаллади.