Ўзбекистон Республикаси Президенти Ислом Каримов Абдуғаниевичнинг Корея Республикасига давлат ташрифи доирасида 2015 йилнинг 26 май куни Сеул шаҳрида Ўзбекистон-Корея бизнес форуми бўлиб ўтди.

Савдо, саноат ва энергетика вазирлиги томонидан ташкил этилган форум ишида Корея томонидан 300дан ортиқ иштирокчи, шу жумладан Корея ҳукумати, савдо, саноат ва энергетика, ташқи ишлар, коммуникациялар, инфратузилма, қурилиш ва транспорт, қишлоқ хўжалиги ва минтақавий тараққиёт вазирликлари раҳбарлари иштирок этишди.

Шунингдек, тадбирда Корея газ корпорацияси, "Lotte group", "Samsung", "LG", "Hyundai", "Hanjin group", "Korean Air", "GM Korea", "GS", "Posko", "Xanva", сингари кўплаб етакчи корейс компаниялари, Эксимбанк, Корея ривожланиш банки, "Корея эксчендж банк", "Шинхан банк" ва бошқа молиявий институтлар ҳам қатнашди.

Бизнес-форумда сўзга чиққан ахборот-коммуникация технологиялари тармоғи вакиллари Ўзбекистонда ушбу соҳанинг жадал ўсиш суратлари ва катта истиқболларини таъкидлашди.

"Бугун "Навоий" аэрoпорти негизидаги халқаро интермодал логистика маркази Марказий Осиёдаги энг йирик ва энг замонавий трамспорт-логистик хаб бўлиб, у энг юқори халқаро мезонларга жавоб беради", дейди "Korean Air" компанияси президенти Чи Чанг Хун.

Унинг маълумот беришича, деярли янгидан қурилган "Навоий" аэропорти бугун муҳим қитъалараро логистика марказига айланиб бораётгани ва Жануби-шарқий Осиё давлатларини Европа ва Яқин Шарқ билан боғлайди.

Шу билан бир қаторда "Korean Air" компанияси Тошкент шаҳрида Кореянинг етакчи олий ўқув юрти - Инха университети филиали фаолиятини ривожлантиришда ҳам фаол иштирок этмоқда. Мазкур ўқув муассасаси замонавий ўқув дастурлари асосида компьютер ва дастурий инжиниринг бўйича мутахассислар тайёрлашга киришган.

Чи Чанг Хунинг қайд этишича, яқин келажакда юк терминали қувватини кенгайтириш орқали "Навои" авиахабини янада ривожлантириш, Тошкентдаги Инха университетининг филиали негизида "Логистика" янги мутахассислиги бўйича кадрлар тайёрлашни йўлга қўйиш, шунингдек, иккинчи халқаро йўловчилар терминалини қуриш орқали Тошкент шаҳри аэропортини модернизациялаш бўйича истиқболли лойиҳанинг амалга оширилишида иштирок этиш режалаштирилмоқда.