Россиянинг Калуга вилояти Наркотик моддалар айланишини назорат қилиш федерал хизмати бошқармаси матбуот хизмати ўзбекистонлик ака-ука асос солган, гиёҳванд моддалар сотиш билан шуғулланган гуруҳ қўлга олинганини маълум қилди.

Ҳуқуқ-тартибот ходимлари тезкор каналлар орқали Обнинск шаҳрида наша сотиш билан шуғулланувчи, ҳеч қаерда ишламайдиган ўзбекистонлик икки ўгай ака-ука ҳақида маълумот олганлар ва уларни ушлашга қарор қилганлар.

Бу жиноий иш билан шуғулланиш фикри ака-укалардан каттасида пайдо бўлди, укаси унинг фикрини қўллаб-қувватлади. Гиёҳвандфурушлар қўл остида анчагина одам: Москвадан шаҳарга наша олиб келувчи курьерлар, тегишли жойларда уларни сақловчи гаровчилар, Интернет орқали буюртма олувчи оператор қиз ишлаган. Бу оғу ижарага олинган гаражда пакетларга қадоқлаб чиқилган. Жиноятчилар нашани турли рангдаги пакетларга солишган ва унинг ичига кичкина магнит солиб қўйишган. Бунинг эвазига улар тез ва нисбатан хавфсиз равишда жамоатчилик жойларида наша солинган пакетларни келишилган бирор жойга қолдириб кетишган.

Шу ҳафтада бу жиноий гуруҳнинг барча аъзолари қўлга олинди. Улар ҳеч қаерда ишламагани ва гиёҳванд бўлганлари аниқланган. Ушбу воқеа юзасидан жиноий иш қўзғатилди ва тергов ишлари олиб борилмоқда.