Европа Иттифоқи Сурия президенти Башар Асад ва унинг атрофидаги мулозимларига “мамлакатда давом этаётган репрессия ва инсон ҳуқуқларининг таҳқирланиши” сабабли санкцияларни яна бир йилга узайтирди. Бу ҳақда Reuters ахборот агентлиги хабар бермоқда.

Европа Иттифоқида Суриядаги вазият оғирлашаётгани айтилмоқда. Суриянинг тахминан 200 нафар амалдори ва 70 та ташкилотига нисбатан киритилган санкциялар (ҳисоб рақамидаги маблағларнинг музлатилиши ва ЕИ ҳудудига киришни тақиқлаш) муддати узайтирилди.

Бундан ташқари, Сурияга қурол эмбаргоси, нефть импорт қилиш ва баъзи хом ашёларни экспорт қилишга киритилган тақиқловлар ҳам ўз кучида қолди. Бундан ташқари, Европа компанияларига ҳанузгача Суриянинг нефть соҳасига маблағ киритиш тақиқланган.

ЕИ томонидан Сурияга қарши санкциялар илк бор мамлакатда фуқаролик уруши эндигина бошланганда, 2011 йилнинг май ойида киритилган эди. 5 йилдан бери давом этаётган ушбу можаро туфайли 220 мингдан кўпроқ одам аязит чекди, миллионлаб сурияликлар қўшни давлатларга чиқиб кетдилар. Сурияда ҳукумат қўшинлари ва мухолифат кучлари ўртасидаги қарама-қаршиликдан ташқари, ИШИД, Озод Сурия армияси ва “Ислом фронти” террорчилик ташкилотлари ҳам бир-бирлари билан курашмоқда.