Охирги 20 йил ичида Ўзбекистон ҳудудида тарқалган Мензбир суғуларининг сони 20 баробарга камайиб кетган. Чотқол давлат қўриқхонасининг маълум қилишича, кўрсатилган даврда ноқонуний овчилик фаолияти оқибатида суғурлар миқдори 100 мингдан 5-7 мингга тушиб кетган.

Қўриқхона мутахассислари ўтказган мониторнинг таҳлиллари натижасида республика Қизил китобига киритилган ушбу жониворлар миқдорини тез суръатларда камайиб бораётгани аниқланди. Қўриқхона катта илмий ходими Елена Бикованинг сўзларига қараганда, Мензбир суғурлари тарқалган ҳудуднинг энг катта қисми Ўзбекистонга тўғри келади, бу эса мамлакат биологлари ва экологлари зиммасига ушбу турни сақлаб қолиш масаласида алоҳида масъулият юклайди.

Суғурни овлаш учун 13 минг доллар жарима белгиланган. Лекин, Бикованинг айтишича, овчилардан ташқари, чорвадорлар томонидан қўриқхона ҳудудига қўй сурувларининг ўтлатилиши ва бунинг оқибатида атроф муҳитнинг ифлосланиши ҳам суғурларнинг қирилиб кетишига сабаб бўлмоқда.