Халқаро регби иттифоқи президенти Бернард Лапассет Тошкентга 5 кунлик ташриф билан келди.

У ўз ташрифи давомида Ўзбекистонда жорий қилинган "Регбига кириш" дастури доирасида амалга оширилиган ишлар билан танишиш, регбичиларнинг спорт базаларига ташриф буюриш, шу соҳадаги масъуллар билан учрашиш ва регби бўйича Осиё чемпионати доирасидаги Ўзбекистон ҳамда Ҳиндистон терма жамоаларининг ўйинларини томоша қилишни режалаштирган.

"Биз учун Бернард Лапассетни Ўзбекистонда кутиб олиш қувончли ҳодисадир. Бу ташрифдан кейин Ўзбекистонда ва Марказий Осийода ушбу спорт янада ривожланишини кутиш мумкин", дейди Ўзбекистон регби федерацияси вакили Содиқ Сафоев.

Қайд этиш жоизки бу Лапассетнинг Марказий Осиё ҳудудига амалга оширган илк ташрифи бўлади. Айни вақтда Марказий Осиё давлатларидан фақат Ўзбекистон ҳамда Қозоғистон Халқаро регби иттифоқи аъзоси ҳисобланади.

Бернард Лапассет 27 майдан 1 июнь кунигача Ўзбекистонда бўлади.