Дунё даражасида рейтингни ушлаб туриш учун Хитойнинг электроника ишлаб чиқарувчи компанияси Lenovo ўз бизнесини ривожлантиришни ноодатий қурилмаларни ишлаб чиқаришга йўналтиришга қарор қилди.

Компания яратмоқчи бўлган янги қурилмалардан бири шоколаддан исталган маҳсулот босиб чиқарувчи 3D-принтер бўлади. Ҳозирча Lenovo бу қурилмани қачон оммавий равишда ишлаб чиқариши ҳақида ҳеч қандай маълумот берилмаган. Бироқ шуниси аниққи, у кўпчилик ширинликхўрлар ва қандолатчилик вакилларининг эътиборини ўзига жалб қилади.

Бироқ Lenovo нафақат ширинликларни хуш кўрувчилар, балки ўз вазни ҳақида қайғурадиганлар учун ҳам қурилмалар яратмоқда. Компания намойиш қилган шундай қурилмалардан бири “ақлли” кроссовкалар бўлди. Спорт пойафзали одамнинг кайфиятини аниқлаши мумкин, бироқ унинг энг асосий вазифаси одам юрганда йўқотадиган калориялар сонини ҳисоблашдан иборат. Бу қурилма вазн ташламоқчи бўлганлар ёки шунчаки ўз қоматини меъёрда ушлаб турувчилар учун жуда асқотади.