Лондоннинг энг камбағал қисми Уэльс ва Шимолий Ирландиянинг энг таъминланган туманларидан бойроқ эканлиги маълум бўлди, деб миллий статистика бошқармаси берган маълумотларга иқтибос келтирган ҳолда ёзмоқда The Independent нашри. Таъкидланишича, бундай хулоса британиялик уй хўжаликларининг соф даромади ҳақидаги маълумотлар асосида чиқарилган.

Статистика бўйича, Лондоннинг Баркинг, Дагенем ва Хаверинг туманлари энг камбағал туманлар ҳисобланади, бу ерда аҳоли жон бошига ўртача соф даромад йилига 16,8 минг фунт стерлингни ташкил қилади. Бу Буюк Британия пойтахтининг ўзига тўқ туманларидаги кўрсаткичдан 2,5 баробар камроқни ташкил қилади.

Поуис Уэльснинг энг бой тумани деб топилган, бу ерда ўртача йиллик соф даромад 16,7 минг фунт стерлингни ташкил қилади. Шимолий Ирландиянинг энг бой тумани деб Ташқи Белфаст топилган, бу ерда ўртача йиллик соф даромад 15,2 минг фунт стерлингни ташкил қилади.

Лондоннинг энг таъминланган уй хўжаликлари Вестминстерда эканлиги маълум бўлди. Бу ерда ўртача йиллик соф даромад 43,6 минг фунт стерлингни ташкил қилади.

Нашрнинг таъкидлашича, Лондондаги юқори даражадаги ўртача йиллик соф даромад қайд қилинган туманларнинг ҳамма аҳолиси ёки кўпчилиги ҳам ўзига тўқ одамлар эканлигини англатмайди.