Ўзбекистонда ишлаб чиқарилаётган маҳсулотларнинг хорижий бозорларда рақобатбардошлигини ошириш мақсадида Кичик бизнес ва хусусий тадбиркорлик субъектлари экспортини қўллаб-қувватлаш жамғармаси Савдо-саноат палатаси билан биргаликда инновацион лойиҳалар танловини эълон қилди.

Танловда илмий-тадқиқот институтлари ходимлари, фермерлар ва тадбиркорлар, тадқиқот гуруҳлари, олий таълим муассасалари ходимлари, олимлар иштирок этишлари мумкин.

Танловдан мақсад маҳаллий ва иккиламчи хомашёни қайта ишлаш ҳисобига олинган маҳсулотни экспорт қилишга мўлжалланган инновацияларнинг янги турларини ишлаб чиқаришдан иборат.

Танлов бешта йўналишдан иборат:
1. Озиқ-овқат саноати.
2. Кимё саноати.
3. Тўқимачилик саноати.
4. Қурилиш материаллари саноати.
5. Машинасозлик ва электр техника саноати.

Танловнинг ҳар бир йўналишида 3 нафар ғолиб аниқланади. Ғолиблар Кичик бизнес ва хусусий тадбиркорлик субъектлари экспортини қўллаб-қувватлаш жамғармасининг диплом ва пул мукофотлари билан тақдирланади. 1-ўрин учун 30 млн сўм, 2-ўрин учун 20 млн сўм, 3-ўрин учун 10 млн сўм мукофот пули берилади.

Танловда иштирок этиш учун аризалар жорий йилнинг 1 июнидан 31 июлигача қабул қилинади.