Россия Фавқулодда вазиятлар вазирлигига тегишли Ил-76 русумли самолёт орқали Суриядан Россия ва МДҲ давлатлари фуқаролигига эга бўлган кишилар эвакуация қилинди. Бу ҳақда Россия ФВВ матбуот хизматига асосланган ҳолда ТАСС нашри хабар берган.

"Ил-76 самолёти Суриянинг Латакия шаҳридан Москва вақти билан 28 май куни соат 19:05да бортида 80 киши билан ҳавога кўтарилди. Самолётдаги йўловчиларнинг 66 нафари Россия, 7 нафари Беларусь, 4 нафари Украина ва 3 нафари Ўзбекистон фуқаролари ҳисобланади", дейилади хабарда.

Йўловчиларнинг 34 нафари болалар экани айтилмоқда.

Самолёт Домодедово аэропортига қўнган.

Бироз олдинроқ, Ил-76 самолёти Латакияга 21,5 тонни инсонпарварлик ёрдами олиб боргани ҳақида хабар қилинганди.

Ушбу ишлар Россия ва Сурия ҳукуматлари келишуви асосида амалга оширилмоқда.

Қайд этиш жоизки, охирги йил давомида Россия томонидан Сурияга жами 530 тоннадан ортиқ озиқ-овқат ҳамда тиббий воситаларни ўз ичига олган инсонпарварлик ёрдамлари етказиб берилган. Ўз навбатида рус самолётлари мамлакат ҳудудидан Россия ва бошқа МДҲ давлатлари фуқаролари бўлган 1,1 минг нафардан ортиқ кишини эвакуация қилган.