Халқаро футбол ассоциациясининг амалдаги президенти Йозеф Блаттер Цюрихда бўлиб ўтган ФИФА конгрессида бешинчи бор қайта сайланди.

1998 йилдан буён ФИФА президенти лавозимини эгаллаб келаётган Блаттернинг ягона рақиби Иордания шаҳзодаси Али бин Ал-Ҳуссейн бўлди.

Биринчи турда овозларнинг 2/3 қисмини ҳеч қайси номзод қўлга киритмагани сабабли, ғолибни аниқлаш учун иккинчи турни ўтказишга тўғри келди. Биринчи тур натижаларига кўра Блаттерга 133 нафар иштирокчи овоз берган бўлса, Ал-Ҳуссейн 73та овоз тўплади. Шунингдек, 3та бюллетень бекор қилинди. Блаттерга биринчи турда ғалаба қозониш учун 7та овоз етмади.

Биринчи тур натижалари эълон қилинганидан сўнг, Ал-Ҳуссейн ўз номзодини ФИФА президентлиги сайловидан олиб ташлади. Шу сабабли Блаттер ғолиб деб топилди.