Equilar компанияси Associated Press ахборот агентлиги билан биргаликда АҚШ компанияларининг энг катта маош оладиган аёл ижрочи директорларининг ўнталигини чоп этди.

Рейтингга Yahoo вакили Марисса Майер бошчилик қилмоқда, унинг даромади 69 фоизга, яъни 49,1 млн долларгача ўсган. 2-ўринни TJX компаниясидан Кэрол Мейровиц эгаллади, унинг даромади 13 фоиз, яъни 23,3 млн долларгача ошган. 3-ўринни Hewlett-Packard ижрочи директори Маргарет Уитмен 19,6 млн долларлик даромад билан банд этди.

Юқори бешталикка PepsiCo компанияси ижрочи диретори Индра Нуйи ҳам кирди, унинг даромади 45 фоизга ўсиб, 19,1 млн долларни ташкил қилмоқда. 5-ўринни Фиби Новакович (General Dynamics) 19 млн долларлик даромад билан эгалламоқда (даромади 1 фоизга камайган).

6-ўринни Виржиния Рометти (IBM, 17,9 млн доллар), 7-ўринни Мэрилин Хьюсон (Lockheed Martin, 17,9 млн доллар), 8-ўринни Патрисия Вурц (Archer Daniels Midland, 16,3 млн доллар), 9-ўринни Ирен Розенфельд (Mondelez International, 15,9 млн доллар) ҳамда 10-ўринни Эллен Куллман (DuPont, 13,1 млн доллар) эгалламоқда.

Equilar ва Associated Press АҚШнинг етакчи компанияларининг 340 ижрочи директорлари орасидан 17 нафари аёллар эканлигини аниқлади. Тадқиқотчилар бу ҳолат АҚШ компанияларида аёл раҳбарлар эркакларга нисбатан камроқни ташкил қилишининг яна бир исботи бўлганини айтишмоқда.