АҚШда йўловчи самолёти Нью-Йорк осмонида охирги лаҳзада учувчисиз парвоз қурилмаси билан тўқнашиб кетишдан олиб қочишга улгурилди. 

“РИА Новости” ахборот агентлигининг хабар беришича, Ла Гуардия аэропортига қўнишга шайланган Shuttle America авиакомпанияси самолётининг учувчиси Проспект-парк устидан ўтаётганда дрон томонидан солинаётган хавфни вақтида сезиб қолган ҳамда тўқнашувдан қочишга муваффақ бўлган.

Бироздан кейин самолёт муваффақиятли қўндирилган, йўловчилардан ҳеч ким жабрланмаган. Воқеа тафсилотлари ўрганилмоқда.

Аввалроқ АҚШ Фуқаролик авиацияси федерал бошқармаси ва Нью-Йорк полицияси 28 май кечки пайт Лонг-Айленд ороли устидан Лос-Анжелес, Кливленд, Бостон ва Буффало шаҳарларига учиб кетаётган 4та самолётга лазер нурини йўналтирган номаълум шахсни қидираётгани маълум қилинганди.