Жанубий Корея иқтисодий ҳамкорликни ривожлантириш жамғармаси (EDCF) 2015-2019 йилларда Ўзбекистонга 415 млн доллар миқдорида кредит тақдим этади. Бу ҳақда Ўзбекистон молия вазирлигига таянган ҳолда РИА Новости агентлиги хабар бермоқда.

Маълум бўлишича, бу ҳажм Ўзбекистон ва Корея ўртасидаги ҳамкорлик дастурида назарда тутилган. Дастур Ўзбекистон президенти Ислом Каримовнинг 27-29 май кунлари Жанубий Кореяга уюштирган сафари доирасида имзоланган.
Жамғарма маблағлари асосида Тошкентда замонавий кўп ихтисосликка эга юқори малакали тиббий марказ, “электрон ҳукумат” тизими давлат ахборот маркази ва бошқа муассасалар бинолари қурилади.

Бугунги кунга қадар жамғарма Ўзбекистонга телекоммуникация, таълим ва ижтимоий соҳалар учун 300 млн доллар кредит тақдим қилган.