Осиё Чемпионати саралаш босқичига тайёргарлик кўраётган Жасур Абдураимов бошчилигидаги Ўзбекистон U-19 терма жамоаси 30 май куни Бирлашган Араб Амирликлар U-19 терма жамоасига қарши ўзининг илк назорат учрашувини ўтказди.
“Жар” стадионида ўтган беллашув 3:2 ҳисобида мезбонлар ғалабаси билан якунланди.
Биринчи бўлимда Миржаҳон Мираҳмадов чап қанотдан узатилган тўпни бош билан дарвозага жойлаб қўйди. Танаффусгача ҳисоб бошқа ўзгармади.
Иккинчи бўлим ҳам ўзбекистонликлар учун омадли бошланди. Рақиб ҳимоячисидан чаққонроқ ҳаракат қилган Суҳроб Нуриллаев жарима майдони ичида ўзининг айланма зарбаси билан дарвозабоннинг узоқ бурчагини нишонга олди – 2:0.
Амирлик ёшлар орадан кўп ўтмай ҳисобни биттага қисқартиришга муваффақ бўлишди. Тўп ўнг қанотдан жарима майдони ичига етказиб берилган паллада рақиб футболчиси ҳаводан келаётган тўпни дарвозага киритди.
90-дақиқада Ислом Қобулов ҳужумга ўтиб, рақиб жарима майдони чизиғи устидан худди иккинчи голда бўлгани каби бурама зарба орқали дарвозабонни доғда қолдирди.
Аммо учрашувда 3:1 ҳисоби кўп сақланиб қолгани йўқ. Меҳмонлар тезкорлик билан ҳужумга ўтишди ва ҳисобни биттага қисқартиришди.
Шу тариқа Ўзбекистон U-19 терма жамоаси Бирлашган Араб Амирликлар U-19 терма жамоасига қарши ўзининг илк назорат учрашувида 3:2 ҳисобида ғалаба қозонди.
Эслатиб ўтамиз, Жасур Абдураимов бошчилигидаги жамоамиз БААга қарши иккинчи назорат учрашувини 31 май куни ўтказади.
Ўзбекистон U18 - БАА U18 3:2.
Голлар: Миржаҳон Мираҳмадов (42), Суҳроб Нуриллаев (76), Ислом Қобулов (90) - Зайид ал Амри (86), Абдулраҳмон Ашкарий (90+3)