Грузия пойтахти Тбилисидаги Глобал тадқиқотлар маркази раҳбари Нана Девдариани мамлакатнинг собиқ президенти Михаил Саакашвилининг Украинанинг Одесса вилоятига губернатор қилиб тайинланиши унинг автоматкик равишда Грузия фуқаролигидан айрилишини англатмаслигини айтди.
“Бироқ бу жуда ёқимсиз ҳолат, бу ҳолат унинг тарафдорларидан тортиб рақибларигача – барчада ёмон таассурот қолдирди. Ҳаттоки унинг президентлик давридаги бошқарувини ижобий баҳолаганлар ҳам унинг хатти-ҳаракатидан норозилар. Унинг қилмиши Грузиянинг исталган фуқаросини ноқулай вазиятга солади”, деб айтди Девдариани.
Девдариани Саакашвилининг бу лавозимга тайинланиши АҚШ сиёсатининг давоми эканлигини қўшимча қилиб ўтди.
“Мустақил давлатнинг собиқ президенти бошқа бир мустақил давлатнинг губернатори бўлгани куракда турмайдиган ҳолатдир. Бироқ менинг фикримча, бу АҚШ тутган сиёсатнинг давомидир – улар ўзларининг амрларига сўзсиз итоат қиладиган ва уларнинг сиёсий манфаатларини амалга оширадиган ўзларининг шахсий сиёсий элиталарини етиштирадилар. АҚШ ҳозирда мана шу жамоаларни у давлатдан бу давлатга ташлашни бошламоқда – бу бошқарувнинг янги услубидир”, деб айтди Девдариани.
Аввалроқ Грузиянинг амалдаги президенти Георгий Маргвелашвили Саакашвилининг хатти-ҳаракатини номуносиб деб атаган эди.