Испаниялик машҳур қўшиқчи Энрике Иглесиас Мексиканинг Тихуана шаҳрида бўлиб ўтаётган концерти давомида қўлини жароҳатлаб олди ва АҚШга даволаниш учун йўл олди. Бу ҳақда Ассошейтед Пресс хабар берган.

Маълум бўлишича, 31 май куни оқшомида ўтказилган концерт вақтида залдан мухлислардан бири сурат олиш учун учирган дрон қўшиқчига яқинлашиб келган. Иглесиас эса дронни ўзидан узоқлаштириш мақсадида уни қўли билан уриб туширмоқчи бўлади, лекин дрон парраклари унинг бармоқларидан бирига жиддий жароҳат етказган.

Тиббиёт ходимлари дарҳол биринчи ёрдамни кўрсатишган ва Иглесиаснинг қўлини боғлаб қўйишган. Шундан кейин, Иглесиас соғ қўли билан микрафонни тутганча 1,5 соат давомида қўшиқ куйлаган. Айни вақтда у Калифорния штатидаги Лос-Анжелес шифохонасига олиб кетилган.

Интернетда Иглесиаснинг оқ футболка кийган ва жароҳатланган қўлидан қони оқиб турган ҳолатида концертни давом эттираётгани тасвирланган суратлар тарқалди.

Қайд этиш жоизки, ушбу 40 ёшли қўшиқчи июль ойида ҳам Мексикада концерт беришни режалаштирган.

Маълумот учун, Энрике Иглесиас Лотин Америка мусиқаси оламидаги энг машҳур замонавий ижодкорлардан бири ҳисобланади. У 20дан ортиқ махсус мукофотларни қўлга киритган. "Гремми" мукофотига ҳам эгалик қилган бу қўшиқчи ўз фаолияти давомида ўндан ортиқ мусиқий альбом яратган.