Мисрда Муҳаммад Мурсийнинг президентликдан четлаштирилишидан сўнг авж олган тўполонларда 2.6 минг атрофида одам ҳалок бўлган. Бу ҳақда ҳуқуқ ҳимоячилари берган маълумотларга иқтибос келтирган ҳолда The Guardian нашри хабар бермоқда.
Таъкидланишича, бу сонлар 2013 йил 30 июнидан 2014 йил 31 декабрига қадар бўлган даврни ўз ичига олади.
2013 йил июлида Миср армияси ҳокимият тепасига “Мусулмон биродарлар” ҳаракат вакилларининг келиши туфайли Мурсийни президентликдан четлаштирган эди. Мурсийнинг тарафдорлари норозилик намойишлари ўтказа бошлади. Уларнинг фаоллари, шу жумладан, Мурсийнинг ўзи ҳам қамоққа олинди.
Инсон ҳуқуқлари бўйича Давлат кенгаши раҳбари Муҳаммад Фойиқнинг маълум қилишича, ҳалок бўлганларнинг ярми собиқ президентнинг тарафдорларидир. Шунингдек, 700 полициячи ва 550 тинч аҳоли вакиллари ҳалок бўлган.