“Ўзқишлоқхўжаликмашлизинг” акциядорлик компанияси жорий йилнинг биринчи чорагида умумий миқдори 39,5 млрд сўмни ташкил қиладиган 990 та қишлоқ хўжалиги техникасини лизингга берди.

Бугунда 36 мингдан ортиқ турли фермер хўжаликлари ва машина-трактор парклари компания мижозлари саналади. Ўтган йил натижаларига кўра, лизинг орқали 267,6 млрд сўмлик 4415 та техника тақдим қилинган.

Айтиш жоизки, “Ўзқишлоқхўжаликмашлизинг” компанияси “Ўзагросаноатмашхолдинг” компанияси ва етакчи хорижий компаниялар билан ҳамкорликда Ўзбекистонда қишлоқ хўжалиги техникасининг 10 дан ортиқ турини ишлаб чиқаришни ташкил этди. Бу техникаларга фермерлар томонидан катта талаб билдирилмоқда. Улар орасида шудгорлаш тракторлари, мини-тракторлар, дискли ўргичлар, ғалла экгичлар, маккажўхори ўриш комбайнлари ва бошқа турдаги техникалар мавжуд.

Бундан ташқари, компания лизинг хизматлари нархини тушириш бўйича ишлар олиб бормоқда. Охирги 15 йил давомида лизинг фоизи деярли 3 марта: йиллик 12 фоиздан 4,5 фоизгача камайтирилган. Шунингдек, лизингга берилувчи техника турлари сони ҳам мунтазам равишда ошиб бормоқда, ўтган йили уларнинг сони 50 тани ташкил қилган.