Ҳиндистоннинг DR International компанияси директори Банварлал Доши жайнизм йўналишидаги ҳинд дини роҳиби бўлиш учун ўзининг 600 млн долларлик бойлигидан воз кечишга қарор қилди. Бу ҳақда The Times of India нашри хабар бермоқда.

Деҳлилик “пластик қироли” деб ном олган Доши 1982 йилдан бери роҳибликка кирмоқчи бўлган, бироқ у фақат ўтган йилигина ўз оиласини бундай йўл тутиш зарурлигига ишонтиришга муваффақ бўлган.
Дошининг компанияси пластмасса ишлаб чиқариш билан шуғулланади.

Дошининг роҳибликка қабул қилиниши маросими 31 майда бўлиб ўтди, унда 150 мингдан кўпроқ одам иштирок этди. Доши ўз бойлигининг катта қисмини жайнизм черковига хайр-эҳсон қилишга қарор қилди.

Энди тадбиркор ўзининг кўчмас мулкидан воз кечиши керак бўлади. У мобиль телефондан фойдаланмайди, фақат оппоқ кийимда юради. Доши ҳар куни тонгги соат 4 да туриб, йога ва медитация билан шуғулланишига, ҳашаротларга зиён етказмаслик учун доимо ялангоёқ ҳолда юришига тўғри келади.