1969 йили Қашқадарёда туғилган фуқаро Шодмон Тўхтаев илон заҳрини ноқонуний сотишда айбланди. Бу ҳақда “Огоҳ” газетаси хабар бермоқда.
Айтилишича Тўхтаевга Умар исмли таниши илон заҳрини сотишни таклиф қилган. Орада келишув бўлгач, Умар тўрт пластик идишда илон заҳри олиб келган. Улар ўз фаолиятларига 19-20 ёшли Ғулом ва Сафарни, 23 ёшли Дилнурни ҳам тортишган.
Шериклар Тошкентнинг Чилонзор туманидаги 1-сонли шифохона қаршисидаги ресторанда ўтириб, даволаниш мақсадида ташриф буюрганларга алдов йўли билан заҳарни сота бошлаган. Илон заҳрининг 1 грамми 60-90 АҚШ долларига пулланган.
2014 йилнинг 18 апрель куни Тўхтаев 200 грамм заҳарни 18 минг долларга сотаётган чоғда қўлга олинди. Суриштирув жараёнида унинг барча шериклари ҳам фош этилди. Жиноий гуруҳ суд олдида жавобгарликка тортилди.