Жанубий Африка Республикасининг иккинчи йирик шаҳри Йоханнесбург яқинида жойлашган Шерлар боғида АҚШлик сайёҳ урғочи шер ҳамласидан олган жароҳатлари оқибатида ҳалок бўлди. Бу ҳақда BBC телеканали хабар бермоқда.

Йиртқич боғ ҳудудидан кетаётган автомобилнинг очиқ ойнасига сакраб, машина ичига кириб олган. Машинада ёш эр-хотин бўлган. Улар шер ҳамласидан оғир жароҳатлар олишган. Аёл олинган жароҳатлардан ҳалок бўлган, эркак оғир аҳволда шифохонага етказилган.

АҚШлик саёҳнинг ўлими 2015 йилда Шерлар боғида рўй бераётган учинчи ўлим бўлди. Шер ҳамласидан кейин боғ соқчилари шернинг кетидан қувлаб боришган, бироқ уни отишга қарор қилишмаган.

Шерлар боғи Йоханнесбургдан шимол томонга 30 км узоқликда жойлашган ва сайёҳлар орасида жуда оммалашган. Боғ ҳудудида гепардлар ва ола-була гиеналар эркин тарзда ҳаракатланиб юради. Шерлар оилалари қўриқланувчи катта қафаслар ичида сақланади. Ташриф буюрувчилар бу қафасларни автомобилларда кесиб ўтиб, йиртқич ҳайвонларни томоша қилишлари мумкин. Бироқ боғнинг ички тартиб-қоидаларига кўра, автомобиль ойнасини тушириш қатъиян ман қилинган.