Марғилондаги мактаб директорларидан бири болаларни биринчи синфга қабул қилиш учун пора олгани аниқланди. Бу ҳақда “Ҳуқуқ” газетаси хабар бермоқда.
Нашрда ёзилишича, 60 ёшли Э. Ахунбабаев Маҳфузахон исмли аёлдан пул тама қилган. У опаси Марҳабохон билан фарзандини умумтаълим мактабига жойлаштириш учун Ахунбабаевга учраган. Директор улардан 100 доллар ва 100 минг сўм талаб қилган. Аёллар ҳозирча 200 минг сўм бера олишларини, қолган ярмини эса бир ойдан сўнг етказишларини айтишган.
Директор аёлларни қоровулхонага бошлаб, улардан пулни олган. Унинг ёнидан чиққан опа-сингиллар милицияга арз қилишган. Ахунбабаев тезда қўлга олиниб, судга топширилган.
Мактаб директори мансабдан четлаштирилиб, тегишли жазога тортилди.