Россия Тергов қўмитаси Тулада 5 кишининг қотиллигини тергов қилиш пайтида мактаб-интернат ва полиция ходимлари ўз вазифаларига масъулиятсизлик билан қараганлари юзасидан жиноий иш қўзғатди, бу ҳақда Тергов қўмитаси матбуот хизмати хабар бермоқда.

30 майда Туладаги Косая Гора қишлоғидаги Орлов шоссеси бўйича жойлашган уйда эрталабки пайт иккита аёл ва учта боланинг пичоқланган жасадлари топилган. Прокуратура маълумотларига кўра, 10 ва 11 ёшдаги қизлар, уларнинг 5 ёшли укаси ҳамда болаларнинг 29 ёшли онаси ва 49 ёшли бувиси ҳалок бўлган. Ушбу босқинчиликда омон қолган оиланинг 7 ёшли вакили ва аёллардан бирининг 37 ёшли машъуқи шифохонага ётқазилган. Қотилликни амалга оширишда гумон қилиниб 29 ёшли Ўзбекистон фуқароси қўлга олинган. “Икки ва ундан ортиқ киши, шу жумладан болалар қотиллиги” моддаси бўйича иш қўзғатилган.

Тергов хулосасига кўра, полиция ходимлари ҳалок бўлган қизлардан бири қўнғироқ қилгандан кейин секин ҳаракат қилганлар ҳамда қотил ноқонуний равишда яшаган ўзларига бириктирилган ҳудудни кўздан кечиришда “ўз вазифаларини тегишлича бажармаганлар”. Мактаб-интернат раҳбар шахслари “ўз тарбияланувчиларини ижтимоий муҳофаза қилиш, уларнинг ҳуқуқларини ва қонуний манфаатларини таъминлаш” ишларини ташкил этмаганликда айбланмоқдалар.