Хитой полицияси 2 июнга ўтар кечаси Янцзи дарёсининг мамлакат шарқидаги Хубэй вилояти ҳудудидан ўтувчи қисмида ҳалокатга учраган "Шарқ юлдузи" номли теплоходнинг капитани ҳамда механиклари бошлиғини ҳибсга олди. Бу ҳақда Хитой миллий телевидениесига асосланган ҳолда ТАСС нашри хабар берган.

Охирги маълумотларга кўра, кема бортида 458 нафар киши бўлган, уларнинг 13 нафари қутқариб олинган, 5 нафар йўловчининг жасади топилган.

Маълум қилинишича, кучли шамол кема ҳалокатига сабаб бўлган. Ноқулай об-ҳаво шароити давом этгани учун қутқарувчиларнинг иши қийинлашган.

Ушбу сайёҳлик кемаси Нанкин шаҳридан Цзяньли тумани ҳудудига кетаётган бўлган. Бортдаги 458 нафар кишидан 47 нафари экипаж аъзолари, 5 нафари туристик компания вакиллари, қолганлар йўловчилар эди.