Мурманск вилояти суди 30 ёшли Эрон фуқаросини Россия давлат чегарасини бузишда айбдор деб топиб, жазога тортди. Бу ҳақда Интерфакс агентлигининг хабар беришича, у Россия ташқарисига чиқариб юборилади.
Айтилишича, Карелия Республикасида бўлган эркак 27 май куни Мурманскка келиб, таксига ўтирган ва Норвегия билан чегарадаги Борисоглебск назорат ўтказиш пунктига йўл олган.
Чегарадаги муҳандис иншоотлари яқинидан ўтиш чоғида у машинадан сакраб тушиб қолган ва симтўр тагидан эмаклаб ўтган. У Норвегияга ўтиб бўлдим, деб ўйлаб тўхтаган пайтида чегарачилар томонидан қўлга олинган.
Айни пайтда у Мурманск вилоятида миграция бошқармаси изолятрида сақланмоқда.