Facebook компанияси таниқли франциялик мутахассис Ян Лекун бошчилигидаги ўзининг сунъий интеллект ва машинавий ўқитиш соҳасидаги ишланмаларининг учинчи лабораториясини Францияда очди. Бу ҳақда ижтимоий тармоқнинг саҳифасида маълум қилинди.

Бу Марк Цукерберг компаниясининг deep learning (машинавий ўқитиш) алгоритмлари бозорида ўзининг интернетдаги асосий рақиби Google билан рақобатчиликда мавқеини мустаҳкамлашга имкон беради. Google компанияси ҳозирда Буюк Британиядаги Оксфорд университети билан сунъий интеллект масалаларини ўрганиш бўйича ҳамкорлик қилмоқда.

Facebook техник директори Майк Шрофер компания Парижни сунъий интеллект ва компьютер технологиялари соҳасидаги истеъдодли мутахассисларни жалб қилиш маркази сифатида танлади.

Яқин келажакда лабораториянинг асосий вазифаси тасвирларни таниш алгоритмини яхшилашдан иборат бўлади. Facebook фойдаланувчилари кунига ўзларининг ленталарига 350 млн тасвир юклашади, юз миллиардлаб тасвирлар уларнинг саҳифаларида ва альбомларида сақланган. Лекуннинг айтишича, янги алгоритмлар график спамни ва эҳтимол зўравонлик акс этган видеони йўқ қилишга имкон беради.

Шунингдек, янги алгоритмлар ижтимоий тармоқнинг реклама имкониятларини кенгайтириш учун ҳам ёрдам бериши айтилмоқда. Компаниянинг рекламадан оладиган даромадлари жорий йилнинг 1-чорагида 42 фоизга, яъни 3,5 млрд долларгача кўтарилган ва шу боис рекламанинг самарадорлигини ошириш компаниянинг устувор йўналишларидан ҳисобланади.