Ўзбекистонга регби бўйича жаҳон чемпионатини бепул трансляция қилиш ҳуқуқи берилди. Чемпионат шу йил Англияда бўлиб ўтади.

Халқаро регби иттифоқи президенти Бернард Лапассетнинг Uzbekistan Today мухбирига берган маълумотига қараганда, бу иш Ўзбекистонда регбини оммалаштириш учун амалга оширилган.
Шунингдек, у Ўзбекистон регби федерацияси билан ҳамкорликда халқаро миқёсдаги мусобақаларни қабул қилиш учун зарурий шароитлар яратилишини баён қилиб ўтди. Қўшма чора-тадбирлар дастури ҳакамлар ва мураббийларни тайёрлаш, техник таъминот ва спорт инфраструктурасини яратишни назарда тутади.

Ўз ташрифи доирасида Лапассет Осиё регби федерацияси йиғилишида иштирок этди. Унинг бошчилигидаги делегация “Регбига кириш” лойиҳасининг Ўзбекистондаги ижроси билан танишиб чиқди.