1 июнда интернетда теннис бўйича Ролан Гаррос мусобақасида теннисчилар Серена Уильямс ва Слоан Стивенс ўртасидаги учрашувни томоша қилаётган фойдаланувчилар физика қонунларига зид равишда думи билан олдинга парвоз қилаётган самолётнинг кортга тушган соясига ўз эътиборларини қаратишди.

SB Nation нашрининг аниқлашича, самолёт ҳақиқатдан ҳам орқаси билан учган, бироқ бу ҳақиқий самолёт эмас, балки Emirates Airlines авиакомпаниясининг промо-рекламаси доирасида бир неча йил аввал стадионда ўрнатилган самолётнинг кичик модели бўлган. Бу модель телевизион камера билан бирга тросга маҳкамланган бўлган, шунинг учун у олдинга ҳам, орқага ҳам ҳаракатлана олган.

Охирги пайтларда бундай жумбоқлар ва иллюзиялар интернетда анча оммавийлашмоқда. 19 майда Reddit фойдаланувчиларини кўприк олдида турган ишчиларнинг сурати ўйлантириб қўйди: бу суратда ишчилар бир вақтнинг ўзида ҳам ерга, ҳам баланд бетон конструкциясига яқин тургандек тасвирланганди.

Апрель ойида Шимолий Корея ОАВлари Совет иттифоқида ишлаб чиқарилган АН-2 самолётига эътиборни қаратдилар: бу самолёт қарши шамол мавжудлигида ҳақиқатан ҳам бир фурсат давомида барқарорлигини сақлаган ҳолда думи билан олдинга уча олади.