Тошкентда оммавий ахборот воситалари вакиллари учун “Давлат бюджети ижросининг ғазначилик тизими” мавзусида семинар-тренинг ўтказилди.

Ўзбекистон Республикаси Молия вазирлиги ва БМТ Тараққиёт дастурининг “Ўзбекистонда бюджет тизими ислоҳоти” қўшма лойиҳаси доирасида ташкил этилган семинар-тренингдан кўзланган мақсад журналистларнинг мамлакатимиз ғазначилик тизими вазифалари хусусидаги хабардорлик даражасини оширишдан иборат. Ушбу тадбир Ўзбекистон бюджет тизимини ислоҳ этиш масалаларига бағишланган туркум семинарлардан бири бўлди. 

"Тадбирда Ўзбекистон Президенти раҳнамолигида мамлакат бюджет тизимида амалга оширилаётган ислоҳотлар ўзининг салмоқли натижаларини бераётгани таъкидланди. Чунончи, солиқ юки босқичма-босқич камайтирилиб, иқтисодиётимиз барқарор ривожланмоқда ва соҳада давлат дастурларидан фойдаланишни кенгайтириш орқали бюджет маблағларидан фойдаланиш самарадорлиги ортмоқда. Шунингдек, ижтимоий соҳалар янада ривожланиб, аҳоли даромади, жамғарилган маблағлари ва харид қобилиятида ўсиш кузатилмоқда", дейилади УзА хабарида. 

Семинар-тренинг доирасида Ўзбекистон Республикаси Молия вазирлиги Ғазначилиги тузилмаси ва унинг вазифалари, Давлат бюджети ижросини таъминлашда ғазначилик тизими хусусиятлари ва бу борадаги тегишли меъёрий-ҳуқуқий база атрофлича кўриб чиқилди.