2011-2012 йиллар мавсуми вақтида Тошкентнинг "Бунёдкор" клубида ишлаган бразилиялик мутахассис ФИФА президентлиги учун сайловларда иштирок этишини маълум қилган.

«Мен ўз кучимни ҳис этяпман. Менда тажриба бор, бутун дунёдаги одамлар мени яхши билишади. Шу боис бу мен учун имконият», – дейди Зико.

Зиконинг сўнгги иш жойи «Гоа» жамоаси бўлган эди.

ФИФА президентлигига сайлов бўйича комиссия вакили Доменико Скаланинг айтишича, янги президентни сайлаш мақсадидаги навбатдан ташқари конгресс 2015 йилнинг декабридан 2016 йилниг мартигача бўлган муддатда ўтказилади. Унгача эса ташкилотни амалдаги президент Йозеф Блаттернинг ўзи бошқаришда давом этади. Ҳозирча бу ўринга асосий даъвогар сифатида УЕФА президенти Мишел Платини ва ташкилот вице-президенти Али ибн Ал-Ҳусайн номзодлари қаралмоқда.