Ўзбекистонда "Қизил китоб"нинг янги нашрини чоп этишга тайёргарлик кўрилмоқда. Бу ҳақда “Chinor ENK” экологик ноширлик компанияси бош муҳаррири Нодира АБДУЛЛАЕВА берган маълумотларга асосланиб, “САБО” газетаси хабар бермоқда.

Ўзбекистон "Қизил китоб"и 1979 йилдан чиқа бошлаган. Дастлаб унга наботот оламининг камёб, йўқолиб кетиш хавфи мавжуд турлари ҳақидаги маълумотлар киритилган. “Қизил китоб” нинг кейинги, 1984 йилдаги нашрига эса Ўзбекистон флорасининг йўқолиб кетиш хавфи остида қолган 163 тури, фауна оламининг эса 63 тури киритилган эди.

Табиатни муҳофаза қилиш ва экологияга оид адабиётларни нашр этиш мақсадида 1996 йилда Ўзбекистон Республикаси Табиатни муҳофаза қилиш давлат қўмитаси муассислигида “Chinor ENK” экологик ноширлик компанияси ташкил этилди. Мамлакатимиз “Қизил китоб”и шундан буён мазкур компания томонидан тайёрланиб, нашр этилади.

“Қизил китоб” даврий нашр саналади. Маълум муддат ичида китобга киритилган турларнинг айримлари тикланиши, айримлари эса турли омиллар таъсирида камайиши мумкин. Шунинг учун ҳам китобнинг ҳар галги нашрида баъзи турларнинг мақоми ўзгаради. Охирги нашри 2009 йилда чоп этилган. Янги китобни тайёрлаш борасида Фанлар академиясининг Ўсимлик ва ҳайвонот олами генофонди институти, табиатни муҳофаза қилиш давлат қўмитаси ҳузуридаги Давлат биологик назорати инспекцияси ва “Chinor ENK” экологик ноширлик компанияси ҳамкорликда иш олиб боришмоқда.