АҚШ Федерал суд маркази директори Жереми Фогель бошчилигидаги АҚШ делегацияси аъзолари Ўзбекистонга ташрифи доирасида Тошкент давлат юридик университетига ташриф буюрди.

Учрашув пайтида меҳмонларга мамлакатимиздаги таълим тизими, суд-ҳуқуқ соҳасида амалга оширилаётган ислоҳотлар, хусусан, замонавий талабларга жавоб берувчи юқори малакали юридик кадрларни тайёрлаш бўйича босқичма-босқич фаолият юритиш ҳақида батафсил маълумотлар берилди.

Бугунги кунда университетнинг ахборот-ресурс марказида 240 мингга яқин адабиётлар, улардан 16 мингтаси электрон кўринишда сақланмоқда.

АҚШ Федерал суд маркази директорининг Ўзбекистонга ташрифидан кўзда тутилган асосий мақсад суд ходимларини тайёрлаш ва малакасини ошириш масалалари бўйича Ўзбекистон суд ҳокимияти вакиллари билан конструктив суҳбат ўрнатиш, суд-ҳуқуқ тизимида амалга оширилаётган ислоҳотларнинг моҳияти, аҳамияти ва хусусиятлари билан батафсил танишишдан иборат бўлди.

Меҳмонлар Ўзбекистон Президенти Ислом Каримов раҳнамолиги остида суд ҳокимияти мустақиллигини мустаҳкамлаш, ҳуқуқий соҳани эркинлаштиришни таъминлаш борасида амалга оширилаётган чора-тадбирларга юқори баҳо беришди.

Учрашув иштирокчилари муҳокама қилинган масалалар бўйича фикр алмашдилар. Хорижий меҳмонларда университет талабаларининг халқаро танловларда иштироки, улар томонидан эришилаётган ютуқлар ва университетда ёшлар учун яратилган замонавий шароитлар ва имкониятлар катта қизиқиш уйғотди.