Ирландия футбол уюшмаси (FAI) ФИФАдан 2010 йилги жаҳон чемпионати учун саралаш даврида Франция терма жамоаси билан ўйинда ҳакам томонидан йўл қўйилган хато учун 5 млн евро миқдоридаги товон пули олинганини тасдиқлади. Бу ҳақда уюшма бош директори Жон Дилейни RTE Radio 1 эфирида маълум қилган.

Эслатиб ўтамиз, 2009 йилнинг 18 ноябрида Франция ва Ирландия терма жамоалари ўртасидаги ҳал қилувчи ўйиннинг қўшимча дақиқаларида французлар ҳужумчиси Тьерри Анри қўли билан тўпни ўзига тўғрилаб олиб, гол урган ва терма жамоасини ЖАР майдонларидаги мундиалга олиб чиққанди. Кейинроқ Анри бу қилмишини тан олган.

Дилейнининг қайд этишича, Ирландия футбол уюшмаси ўшанда бу ҳолат бўйича судга мурожаат қилмоқчи бўлган, лекин ФИФА "ишни босди-босди қилиш" учун 5 млн евро бериши эвазига бу ниятидан қайтган ва "турли эҳтиёжлар" учун бу товон пулини олган.