2000 йилдан буён Ўзбекистон ялпи ички маҳсулотининг энергетик самарадорлиги кўрсаткичлари икки баробарга ўсди, деб хабар бермоқда "Газета.Уз". Бу ҳақда “Энергия самардорлиги – иқтисодиётни янада ривожлантиришдаги бош омил” мавзуида ўтказилган конференция чоғида баёнот берилди.
Тадбир иқтисодиёт вазирлиги ва Жаҳон банки ваколатхонаси томонидан ташкил этилди.
“Ўзбекистон ЯИМ энергия самарадорлиги 2000 йилдан буён нефть эквивалентида 0.98 тоннадан 0.48 тоннага ошди, ва бу тенденция янада ривожланиб бориш салоҳиятига эга”, – дейилади вазирлик материалларида.
Айни пайтда мамлакатда саноатда энергия самарадорлигини ошириш дастури амалга оширилмоқда. Лойиҳани молиялаштириш учун 125 млн доллар миқдордаги маблағ Жаҳон банки томонидан ажратилди. Соҳадаги инвестициялар энергетик тизимларни ва саноат ускуналарини алмаштириш ва модернизация қилиш, иситиш учун иккиламчи иссиқликни қўллаш, муқобил энергия манбаларини ривожлантиришга йўналтирилмоқда.