Тошкентдаги Mega Impex Business МЧЖ фаолиятида ноқонуний ишлар амалга оширилгани фош этилди. Воқеа тафсилотлари “Ҳуқуқ” нашрида келтирилган.
Маълум бўлишича, компания масъуллари Халқ банкининг Мирзо Улуғбек филиалига экспортга жўнатилган қишлоқ хўжалиги маҳсулотларига гўёки Фарғона вилояти Ёзёвон туманида истиқомат қилувчи фуқаро билан 2014 йили тузилган ер ижара шартномасига асосан жамият томонидан етиштирилганлиги тўғрисида сохта маълумотлар тақдим этган.
Аслида улар қишлоқ хўжалиги маҳсулотлари экспортидан тушган 1 млн 513 минг доллардан эллик фоиз мажбурий сотувни амалга оширмасдан, маблағни Буюк Британиянинг Sport Ventures L.P. ва Hilsone Management L.P. компанияларига ўтказиб, 756 минг доллар миқдоридаги чет эл валютасини яширган.
Бош прокуратура ҳузуридаги СВОЖЖДЛҚК департаментининг Тошкент шаҳар бошқармаси ходимлари томонидан жамиятда ўтказилган текширув натижасида бу хатти-ҳаракатлар фош этилди. Аниқланган ҳолатлар юзасидан МЧЖ мансабдорларига нисбатан жиноий иш қўзғатилиб, улар суд ҳукми билан жазога тортилди.